Elchining murojaati
Oʻzimni tanishtirishga ruxsat etsangiz, men XATORI Takashi, Oʻzbekistonga shu yilning 2-dekabr kuni keldim. Yaponiya va Oʻzbekiston oʻrtasida diplomatik aloqalar oʻrnatilganining 30 yilligi nishonlanayotgan ushbu salmoqli yilda Yaponiyaning Oʻzbekistondagi elchisi etib qayta tayinlanganim men uchun katta sharafdir.
Oʻzbekistonga elchi boʻlib tayinlanishimdan oldin, Vankuverdagi Bosh konsullikda va Yaponiyaning Koreyadagi elchixonasida faoliyat yuritganman. Markaziy Osiyoda ish olib borish uchun birinchi marotaba yuborilgan boʻlsam-da, Oʻzbekiston — oʻzining boy tarixiga ega boʻlgan, Yaponiyaga nisbatan doim doʻstona munosabatlarni olib borgan mamlakat ekanligini va men ushbu mamlakatda ishlash imkoniyatini sabrsizlik bilan kutganimni bildirishni istardim.
Yaponiyaning muhim strategik hamkori — Oʻzbekiston bilan boʻlgan aloqalar soʻngi yillarda tobora kengayib bormoqda. 2019-yilda Oʻzbekiston Respublikasining Prezidenti janob Mirziyoyevning Yaponiyaga uyushtirgan rasmiy tashrifi ikki tomonlama aloqalarni yanada mustahkamlashga xizmat qildi. Bu yil koronavirus infeksiyasining kamayishi munosabati bilan tashriflar soni yuqori darajada yangilandi, xususan Tashqi ishlar vaziri janob Xayasi va boshqa bir qator yuqori martabali amaldorlar Oʻzbekistonga tashrif buyurdi. Bundan tashqari, joriy yilda Nara va Samarqand shaharlari oʻrtasida hamkorlik oʻrnatish va ushbu shaharlarni, shaharlar va mintaqalar oʻrtasidagi hamkorlik almashinuvini yanada rivojlanishiga xizmat qiladigan, qardosh shaharlar deb tan olish toʻgʻrisidagi kelishuv imzolandi.
Shuningdek, Oʻzbekiston joriy yilda Shanxay hamkorlik tashkiloti (ShHT) va Turkiy davlatlar tashkiloti (TDT) sammitlariga mezbonlik qilib, xalqaro maydonda oʻz oʻrnini mustahkamladi. Shu munosabat bilan, rivojlanib borayotgan Oʻzbekiston bilan yanada samarali munosabatlarni oʻrnatish uchun turli sohalarda hamkorlik olib borishga tayyor ekanligimni bildirmoqchiman.
Yaponiya va Oʻzbekiston oʻrtasida oʻtmishdoshlarimiz tomonidan oʻrnatilgan va bugungi kungacha rivojlanib kelayotgan doʻstona munosabatlarni saqlab qolish va yanada mustahkamlash uchun saʼy-harakatlarimni ayamaslikka tayyorman va meni samimiyat ila qoʻllab-quvvatlashingizga umid qilaman.
2022-yil 7-dekabr
XATORI Takashi
Yaponiyaning Oʻzbekiston Respublikasidagi Favqulodda va muxtor elchisi